Häärzlig willkomme ùff ùnserer
Club-Homepage!

Liebi Followers

Dr Summer isch verbyy, d Fasnacht 2026 kùnt schò glyy.

Am Fritig, 19. Septämber hänn die Aggtive an dr Sujetsitzig beschlosse, dass si wider  am Gòòrtèèsch vo dr Fasnacht 2026  mitmache. Die alti Gaarde dergeege macht e spirituelli Pause. Au Sujet 26 isch e beschlosseni Sach, wird aber vorèrscht bis zur Uusgoob vom Rädäpäng zrùgg ghalte us verständliche Grind. Fir dr Waagebau hänn mir e Leesig gfunde. Wenn Du wisse willsch wo mir  dr Waage umrischte denn gang btte in "Club-Mitteilungen" yyne. 

Unseri Mitglieder wärde rächtzytig no separat yyglaade an unseri Waage-Vernissage, Gòòrtèèsch-Apero im bishärige traditionelle Raame. Mir hoffe ùff e scheeni Fasnacht mit allem Drùm und Draa und fraie uns saumässig.

Wenn s di interessiertt kasch zue jeedere Zyt in unserem Archiv  uff e  baar Fotene und Sujet vo de letschte Jòòre spigge. 

dr Daig-Affe-Club

Daig-Affe-Hymne - Gesang: Roman Schnarrenberger; Text: Urs Brodmann

Ursprung:

Anno 1933,  also vor iber ninzig Jòòre,
isch dr Daig-Affe-Club gebòòre
e baar Bègger, wo sùnscht dien Weggli bache,
hänn wèlle z Baasel Faasnacht mache!
Am Gòòrtèèsch mitwaggle sait iine nyt,
fir so èppis sinn si aifach zweenig fyt!

Dòòrùm isch d Ydee kòò glyy,
mit Ròss und Waage bisch derbyy.
Si hänn schò rächt kà naimedùùre,
fir e Waageglygge länggt e gueti Schnùùre!

Sälbi Zyt, das isch nit zem Lache,
het d Waagebsatzig no sälber nò Weggli bache!
Die Tradition hän mir bis hitte bhalte,
mir mache nò Faasnacht wie die Alte!
Mit dem Bache stimmt das halt nimme esoo,
mir lòsse die d Weggli ganz frisch lo koo!
E jeede waiss, vòm Glaibaasel bis Schafhuuse,
dr Daig-Affe-Club git die am Gòòrtèèsch nò uuse!

Mir saage Eich nur ains,
hesch kai Blagette, bikunsch e kains!

dr Daig-Affe-Club

Text zur DAC Hymne  (Melodie z Baasel am mym Ryy)

Z Baasel am mym Ryy,
e Daig-Aff mecht i syy,
an dr Faasnacht uf em Waage,
due ych gäàrn e Larve draage,

I: an dr Faasnacht, an mym liebe Ryy. :I

Als Daig-Aff waisch genau,
derfsch nit due wie ne Sau,
nai muesch immer heeflig blyybe,
und nit alles iberdryybe.

I: an dr Faasnacht, an mym liebe Ryy. :

Die drei Dääg in dr Stadt,
find ych schandbaar glatt,
isch emoole nit vyyl loos,
gang i grad in Baggestoos.

I: an dr Faasnacht, an mym liebe Ryy. :

Um das doo dytlig z saage,
mir sy kai Waggiswaage,
mir kemme nämlig zimlig druus,
und spiile jeerlig e Sujet uus.

I: an dr Faasnacht, an mym liebe Ryy.:I

Z Baasel an mym Ryy,
e Daig-Aff mecht i syy,
vom Süde bis in Nordweschte,
isch unseri Fasnacht s Allerbeschte!

I: an dr Faasnacht, an mym liebe Ryy.:I

Laider isch ùnsere scheene Waage am 12. Abrille 2024 bim Groossfyyr in dr Lagerhalle in Därwyl  vollständig aabe brennt!

Nochruef Waage DAC (2024)

 Waisch no, - das kasch jetz saage,
mir dängge do an unsere scheene Waage!
Laider het s miese so koo,
dr Fyyrdeifel het in mit sich gnoo !

Mir derfe nit dra dängge, s macht so wee,
soone Waage wird me nie mee gsee!
Innert wenige Stunde isch verschwunde,
wofir mir uns hän gschunde vyyli Stunde!

Aagfange het s vor Joore,
wo unsere Waage isch geboore,
Vier Reeder und e roschtig Gstèll,
Hän zerscht dänggt, was das sell?
S het aber super k haue
so aifach hän mir afo baue!

Die erschti Biez, mir wisse das no guet,
epis due, dermit das Gstèll nit wyter roschte duet!
Jeede Winkel und au alli Egge,
hän mir mit Schutzmittel miese abdegge!
Sythäär perseenlig sappermoscht,
sin Daig-Affe alli frei vò Roscht!

Was uuse koo isch hän alli gsee,
e Luxus-Waage was wotsch no mee!

Doch jetz hän mir dr Drägg,
alles isch ganz ewägg!
Bierhaane, Lätärne und so wyter,
alles futsch das isch ganz bitter!
nit numme dr nei Sunne-Stoore,
au s Mateial und Wärkzig hän mir verloore!

Hoffe numme me het s kenne vermyyde,
dass unsere Kuschelaff nit het miese lyyde!

Trotz däm grosse Entsetze,
s Materielle ka me ersetze!
Doch d Weemuet blyybt no doo,
au die wird mit dr Zyt vergoo!

Mien halt zämme stoo,
und wider vò 0 afoo!
Mir luege vorwärts und nit hinde dryy,
Näggschti Fasnacht sin mir wider derbyy!

 dr Daig-Affe-Club