Kùltuur und Sport in alle Èère,
jetz setti s Fantom nò schwimme lèère!
(Daig-Affe druure jètz schò ums Musical-Theater Baasel)
In Baasel hän mir scho Vyyles gsee,
ains nach em andere verschwindet mee,
e Wältstadt will me blyybe,
d Kultuur wird aber langsam verdryybe!
E Hallebaad isch neetig und villicht au guet,
aber epis, wo s Musical-Theater nie ersetze duet!
Soonig alti Zyte würde mir nò so gärn begriesse,
kènnte mir s Fantom doch noonemoole gniesse,
iber Raamestiggli im Drummeli dèrfe lache,
d Muusig vom Morricone und de Queens loo grache,
Kätzli uff dr Biini wider scheen lo danze,
dèrfe nit draa dängge - s friert aim grad an Ranze!
Doch das alles setti me vergässe,
äs sig schyyns nimme vò allgemainem Interässe!
Us wirtschaftliche Grind hän mir vernoo,
mir frooge ùns, worum het das miese sò koo?
Das isch numme aini vo unsere Soorge,
mir dängge halt hitte schò an ibermoorge!
Goot s in däm Stiil wyter,
wird s aimool mee ganz schyter!
Us haiterem Himmel het s wider kracht,
s Hotel Baasel het au zue gmacht!
Das isch wie e schlächte Witz,
au das nò, - näbem Kaffi Spitz!
Doch das mien mir jetz loobe,
me het die Schliessig ume Jèèrli verschoobe!
Unseri Stadt macht langsam schlapp,
alles goot efang dr Bach dùrab !
Au am Barfi verschwinde Baize noodisnoo,
zlètschtamänd blyybt dèèrt nùmme Kiirche stoo!
Dr FCB schuttet au nimme wie friener,
die Goofe rènne uff em Blatz umme wie Hiener,
kaine waiss, - wo aane är sell gingge,
esoo würd ùns au s kygge stingge!
Do maine dr DD und syni Kumpaane,
jetzt muess wider e neie Trainer aane!
Was uns doo draa am maischte stèèrt,
sy hän us gmachte Fääler nò gar nyt glèèrt!
Doch verglèmmi wär hätti das dänggt,
s het doch nit zem letschte Tabälle-Plätzli glänggt!
Doch mir wän nit wyters klaage,
andere goot s jò au an Kraage!
Ganz èèrlig, me duet erscht jetz halt gsee,
sit em Mässestäärbe goot gar nyt mee!
Derfir duet me lieber Tepfli pflanze,
mir sette derbyy Fraid ha am Ganze!
Schatte sell die Begrienig gee,
e soone bleedi Schnapsidee!
Kasch di kèère und au wände,
äs duet alles, numme kai Schatte spände!
Doch d Bòlitigg blybbt doo stuur,
däm sait me hitte «Stadtkultuur»!
Nach all däm fùùrchbaare Lyyde,
hän mir doch nò e Sach zem Uffschnyyde!
Äs schnyynt, vyyles isch jetz wider im Loot,
mir Baasler hän ändlig wider e Bundesroot!
Me ka nùmme hoffe dass unsere neie Stärn,
e weeneli häller lyychtet als die andere in Bärn!
Trotz allem isch s hitte halt glyych esoo,
Tradizioone verschwinde noodisnoo!
Drum halte mir an unserer Faasnacht fèscht,
vò allem isch die nò s Allerbèscht!
