ZÈTTEL 2012

Stirb langsam!

(Vòòrhäärsaag fir s Baasler Barteiblättli)

 

Schyynts isch dr Schèffredaggter,

e èèrlige Maa mit Karaggter,

äär sait graduuse was äär dänggt,

mir frooge ùns, ob das fir Baasel länggt?

 

Sini Laitardiggel sinn böimig guet,

fir soo èppis uuse z loo bruucht s aifach Muet!

Äär isch aaständig und fir kai Bartei,

e dèèrig Gattig isch fir uns ganz nei!

 

Dòòrùm kènne mir fascht nit verstoo,

wòrùm sovyyl Abonänte die Zytig dien verloo!

Au sini Fäärnseediskussioone sinn doch famoos,

isch äär derbyy, isch èppis loos!

Sini Kòlleege sinn alli glyych,

alles anderscht als nùmme schyych!

Die hänn doch alli naimedùùre,

die äänlig grossi Schnùùre!

Si hänn au alli dä ùnhaimlig Drang,

und raiffle mit billige Argumänt ùff Wäälerfang!

 

Äs schyynt ùns dòòrum wichtig,

me allersits spannt, das Blèttli faart in die falschi Richtig!

Mir maine, und zwòòr ooni beese Wille,

dä Stiil vò Schuurnalismus setti me kille!

 

Mir mèchte suuberi Infòrmazioone,

wo sich e Bligg drùff würdi loone!

Iber Baasel und d Regioon miessti me mee brichte,

äs gäbi doo driiber e huffe anderi Gschichte.

 

Au ibere Spòòrt kènnti me besser schryybe,

vor allem miest me reaalistisch blyybe!

Wär intressiert sich hitte fir sovyyl Kùltuur,

dä Dail bruuchti eebefalls e Abmagerigskuur!

 

Äs duet ùns Baasler fùùrchbar wee,

wie mir miese d BAZ langsam stäärbe gsee!

Apropoo, die Froog isch lang gsi strittig,

wäm ghèèrt äigedllig die Zytig?

mir glaube, mir dien spinne,

au doo het dr Blocher sini Finger dinne,

 

 

me sait däm verwitscht „inflagranti“,

jetzt isch es wider dr Tettamanti!

Mir kènne im neie Bsitzer nùmme empfääle,

die Redaggtion äntlig grintlig dùùresträäle!

 

Und mit däre Bartei vò de Buure,

bringt me hitte s Vòlgg nimme ùff Duure,

äs goot doch allne efang ùff d Niere,

das allewyyle Uusrieffe und Blagiere!

Die letschte Waale hänn s richtig zaigt,

dääwääg Bòlitisiere isch Vergangehait!

 

Fascht alli hänn wie mee dènn lènger gnue!

Vò däm eewige Machtgedue,

Au bi de Waale fir dr Bùndesroot,

lyydet die Bartei grossi Noot,

 

mir lache ùns e Schranz,

iber das Gschwätz vò dr Konkordanz!

 

Iri  Exponänte sette sich emool iberleege,

wär s nit gscheiter, anderi Maniere z pfleege?

äs frait ùns, e baar hänn das kapiert,

wo das Gjoomer schlussänlig aane fiert,

und goot dr Blocher bald in Ränte,

het au BAZ wider iri Abonänte!