ZÈTTEL 2011

Mir mache Fèèrie im Zoovartis!

 

Wisse Diir, mir kèmme ùs em Baasler Zolli,

das isch jètz e groossi Baustèll, e ganze Thòlli !

 

Isch das aaber nit zùm Lache?

das wäri e Grùnd fir ùns zùm Fèèrie mache,

dasch aifach e weeneli fyys,

Fèèrie mache zwische Ratte und wysse Myys!

 

Mir mien ùns wiirgglig frooge,

wèlle die ùns emänt dèèrte blooge?

bi Lyt mit Vòòrfänschter und wysse Kittel,

kèmme miir ùns vòòr wie im Spittel!

Me sètti das aifach wisse,

mir fyyle ùns mee als bschysse!

 

Aes isch doch zem Luuse,

mir saage das graduuse,

dasch druurig aaber wòòr,

ooni ùns kùnt aim dr Zolli graad läär vòòr!

mir mèchte jò nit miesse liege,

ooni ùnseri Fään isch s Affelääbe kai Vergniege!

 

Dä ganzi Rùmmel ùm is Affe,

macht ùns richtig d Schaffe,

mir hänn s doch naimedùùre guet,

bruuche bi Rääge wäder Baareblyy nò Huet,

au s Bolitisiere liigt ùns fäärn,

fir das hänn mir gnueg Kòleege in Bäärn!

drùm sinn mir nò soo froo,

wènn me ùns dermit in Rue duet loo!

 

Wie schò ùnseri Aane,

spùtte mir fir s Lääbe gäärn Banaane!

dien vyyl bääbele mit unsere Goofe,

wie alli Mèntsche, die Gscheite und die Doofe!

 

Mir kènne allewyyl glatti Faxe mache,

dermit dr Zollibsuecher èppis het zem Lache.

mir glättere au gäärn ùmmenand,

-­‐ isch dènn das e soonig Schand ?

 

vò Grund ùff sinn mir doch ganz rächt,

behandle dien mir ùnseri Wäärter au nit schlächt!

 

Die Sach stimmt is aifach bitter,

wòrùm hògge mir aigedlig hinder Gitter?

vilicht maine mir das nùmme,

und die vòr em Keefi sinn die Dùmme!

 

Sinn mir nach de Fèèrie im Zoovartis nò gsùnd,

wäri das e guete Grùnd,

ùns wiirgglig kènne z fraie,

fir unser Affehuus, das Neie,

me het s dèrfe lääse in dr BAZ,

mir haige dèèrt schyynts mee Blatz!

 

Mir blange ùff dä Mòmänt,

wò ùnser Asyyl doo het e Aend, 

mir wiider suuber schnuufe kènne,

und ooni Alpdräum dèrfe dùùre penne!

 

Mir Affe ghèère doch nit in d Kèmyy,

gseen mir bigòscht esoo biirewaich dryy?