Faasnacht 2022 – Iber 25 Jòòr bim Telebasel !

(Eppis hindedryy, mir sin bim Gratuliere au derbyy!)

Vor zwei Jòòre, dr Schògg stèggt no in de Gnòche,
het me d Fasnacht 2020 gschwind abbroche,
mir finde das hitte nò saumässig schaad,
denn unsere Sujetwaage wäri gsyy baraad!

Au dr Zeedel isch druggt zem Vergää,
nieme het in laider kènne nää!
Doch esoo isch das halt,
me sait däm schyyns «Heecheri Gwalt»!

Luege mir fiirsi und nit hindedryy,
esoo dernääbe isch unser Sujet nit gsyy,
dr Dani isch jo au nò doo,
drum hän mir sy Jubiläum als Aalòss gnoo,
wenn s nit wyters setti stèère,
dien mir syni Laischtige rùggbliggend èère!

Aer ghèèrt au zu däre Sorte,
wie mir zwai Jèèrli älter isch worde,
me duet das im aber kuum aagsee,
het hèggschtens ai bis drei Falte mee!
Am Mikrofon immer in Form,
sy Daatedrang isch nòch wie vor enorm!

Au am Färnsee macht är e gueti Falle,
sini Ständli dien de Gumsle bsunders gfalle!
In Eèrfùùrcht zien mir vor im unsere Huet,
was är sò im Alldaag alles laischte duet!

Alles ùffzèlle miesti dr Zeedel spränge,
s Bapyyr derzue würdi nimme länge!

Vom Moderiere bis zur Schauspiilkùnscht,
und nò vyyles mee liigt in synere Gùnscht.
Als Buechautor, das isch uns blyybe,
het är au e baar Thriller gschryybe!

Aer het s versuecht mit vyyle Sache,
kaa sauguet Radio und Färnsee mache!

S Väärslibrinzle mit synere spitze Zunge,
das isch im aber nit so ganz glunge!
Die Corona-Gidichtli, das isch z Baasel esoo,
hätti är lieber de Zeedelschryyber iiberloo!

Ganz nääbebyy, das isch aber guet,
waiss me, är gärn Wèllofaare duet!
Gäll Dani, hoffe mir di Aktioon het gryffe,
«Schalt doch s Liecht aa du Pfyffe»!
Muesch kaini Pfunzle mee verdaile,
und bròbiere die Sinder welle z haile!

Dr Covit 19 wird efang Nääbesach,
au dr letschti wird langsam wach!
Aber Gott sei allem Dangg,
är macht doch nit alli grangg,
die maischte hän sich dergeege lo impfe,
und mien nimme iber dä Virus schimpfe!

Zum 25. Jubi-Jôôr, äs well !
gratuliere mir an däre Stell!

Zwai Wùùche hindedryy!

S Beschte kùnt am Schlùss,
ändlig isch’es nämlig dùss,
im erschte Momänt finde mir das glatt,
d Fasnacht 22 findet wirgglig statt!
Doch nùndefaane duet das wee,
an däre Fasnacht dèrfsch kai Waage gsee!

Alli andere loot me uff Gass,
fir e Wäägeler isch so èppis krass,
Mir fyyle ùns drum verschysse!
mien aber in dä suuri Èpfel bysse.
Schyyssdräggziigli sin fir Binggis guet,
mit däm hän mir weniger am Huet!
E Fasnacht ooni richtigi Wääge,
das isch wie e Abdanggig ooni Sääge!

S Guete, nach däne pandemische Sache,
mir dèrfe wider e weeneli Fasnacht mache!

In däm Sinn, e scheeni Fasnacht allewyyl

Alles iber ùns Daig-Affe kàsch uff
däre Homepage lääse:
www.daig-affe-club.ch

Kommentare sind geschlossen.