Faasnacht 2021 – Corona, ains muesch no wisse, wäge dir goot s uns verschisse !

(Daig-Affe mien au schandbaar lyyde!)

Vor Jooresfrischt, wär hätti das dänggt, 
het me uns dä Virus yyne ghänggt!       
Vo dä Kyneese sell är schyyns koo,       
spiilt kai Ròlle, jetzt isch är aifach doo!            
Mir finde das zwoor saumässig dernääbe,
äs nùtzt nit, mir mien mit däm lääbe!   
  
Doch Gott sei Dangg,       
är macht doch nit gar alli grangg,                
numme, - äs isch halt glyych verschisse, 
mir dien d Fasnacht saumässig misse!                                           
Wie s letschte Joor, dr glyychi Saich,            
kai Gòòrtèèsch und kai Moorgestraich,       
kai Määlsùppe und kai Ziibelewaaie,     
mit däm Gedangge duesch duure draaie!         
  
Wär kaa dènn das bigryffe,         
kai Drùmmle und au kai Pfyffe,  
au e Wäägeler duet das verdriesse,       
kaini Räppli und kaini Orange schiesse!           
  
Aes duet aim im Härze wee,       
e sèttig Schyssdrägg het me no nie gsee! 
Mir hoffe alli, s kunt wider guet,   
mit Driebsaal hänn mir nyt am Huet!    
Mir wisse so zimlig gnau,            
s näggscht Joor isch wider Waagebau!  
  
Mir maine, unser Sujet macht no Sinn,  
und dr Dani isch bis denn au no inn!     
är git sich Mie, das muess me im loo,    
zem Zaige, är isch no voll doo,    
är het s versuecht mit vyyle Sache,        
was är guet kaa isch Radio mache!        
S Väärslibrinzle mit syynere spitze Zunge, 
das isch im aber nit so ganz glunge!    

Syni Corona-Gidichtli, das isch z Basel esoo,    
hätti är lieber de Bänggler und Zeedelschryyber iiberloo!    
  
Covid 19, - dr Deifel sell di hoole,          
du hesch uns zwai Mool d Fasnacht gstoole,
mir hoffe, die Impfig wird eppis nitze,  
und uns kinftig vor dir schitze!   
  
Mir wider derfe Waage baue,     
d Lyt sich wider vòruuse traue!  
Mir wie friener kennte d Fasnacht gniesse,
jeeggis - wie mir das wärde begiesse!      
  
Drùm liebs Publikum, haltet bitte d Reegle yy,  
denn isch hòffedlig bald dä Spuuk verbyy !     
  
Me gseet sich an dr näggschte Fasnacht 
oder scho an dr Waagevernissage!       
  
In däm Sinn           
  
              dr Daig-Affe-Club  
  
   

Kommentare sind geschlossen.