Faasnacht 2008 – Fimfesiibezigjòòrundainacht, dr Daig-Affe-Club Faasnacht macht!

„Acht Daig-Affe wie im Märli“

Sit fimfesiibzigjòòr derbyy,
das isch nit èpper esoo glyy,
sit nyynzehundertdreiedryssig,
si Daig-Affe jeedi Faasnacht flyssig.
Dissjòòr, soo hän mir dänggt,
het sich kai bsùnders Süüschee fir ùns ùffdränggt,
doo kàsch efang mache was de wit,
die maischte versteen ùns soowisoo nit,
und nùmme wäge de Subventioone,
duet sich unseri Mie nit loone !

Statt sinnloos Dääfeli und Òrangsche z`schiesse,
mèchte mr die Fasnacht snderscht gniesse,
zrùgglääne ùnderem Baldachin wie e Schaich,
numme hän mir kai Eel, das isch dr Saich!
E weeneli dräume und sich bsinne an verwicheni Zyte,
was isch andersch zwische gèschtert und hitte?

Vor iber fimfesiibezig Jòòre,
isch unser Club gebòòre,
e baar Bègger, wò sùnscht dien Batzelaibli bache,
hän wèlle z`Basel Faasnacht mache,
am Gòòrtèèsch mitwaggle, das sait iine nyt,
fir so èppis sin si aifach zweenig fyt!

Dòòrùm isch d`Ydee kòò glyy,
mit Ròss und Waage bisch derbyy.
Si hän schò rächt kà naimedùùre,
fir e Waageglygge längt e gueti Schnùùre!
Die Tradition hän mir bis hitte bhalte,
mir mache nò Faasnacht wie die Alte.

Mir sy au us guetem Holz,
und uff unser Alter stolz.

Aentlig muess me emol gsee,
mir sy schò lang kaini Waggis mee,
mir sy zwààr uuralt, das gän mir zue,
vò dr Faasnacht bekèmme mir sber noonig gnue!

Mir dängge halt au doo draa,
jede foot emool als Binggis aa,
und bi de erfaarene Alte,
bisch immer nò am beschte ghalte.

Gritte stòpfe und dumm rèère,
das duet ùns hitte sälber stèère,
nadirlig dien mir au gäärn lache,
Bleedsinn und Sprichli mache!

Me muess nie welle iberdryybe,
alles sètti im Raame blyybe!
Mir pfläge d`Faasnacht fir die Guete,
fir die wo muesch ha kai Ruete,
vò de KòtzmÈgge hän mir langsam gnue,
zue däne rieffe mir, blooset ùns in d`Schue!

Wie for fimfesiibezigjòòrundainacht,
wärde nò vo Hand siessi Weggli gmacht, (Galatsche)
e jede weiss, vòm Glaibaasel bis Schafhuuse,
dr Daig-Affe-Club gyt die am Gòòrtèèsch uuse!

Miir sage Eich nur ains,
Hesch kai Blagette, bikunsch e kains!

Kommentare sind geschlossen.