Faasnacht 1986 –

Me predigt uns, mer solle spare !
Braitdruggti Byrofidle haig's in Basel gnueg !
Das foht scho a bim Drämmlifahre
's haig vyl z'vyl Kontrolleure wo me-n-anelueg !
Me het au gwärwaisst wäge dane Gselle
Wo vom Glooreplatz här wisse, wie das goht -
Wo me kennt an d'Kurble anestelle
Zem halbe Zahldagsgiggli - wie me das verstoht !

Doch d'Salamiaraber vo Sardinie
Syge noh-n-em sibte Haltstellkaffi zue !
D'Tamile uff dr lāndlige Elfer - Linie
Die iberfahre sicher doch kai Kueh !
Mit Türgge, Wieschteschaich und Beduine
Wär me-n-au versegglet und schwar ynekeyt:
Die liesse numme diggi Zwatschge-n-yne -
(dr Mohammed haig das scho friehner gsait)

Facit: Mer sueche Rueche uffem aigene Pflaschter.
Die Schlauschte spriesse-n-in dr Santihans.
's gite Verainli mit däm ghaime Laschter;
Die kurble-n-us Vergniege iber jedi Gans!
E mänge doderby macht gaischtig sich uff d' Sogge
Und draumt, er wetz dr Spalebärg duruff -
Er brämst mit Sandsturm - wirft sy Gwicht uff d'Glogge!
Und machti usem Drammdepot ai Buff!

Dr Mathys isch as Schuelerbueb und Bebbi
Au sone grien aghuuchte Fan in dam Verain.
Är rysst uff d'Dante Schuggi fascht e Seppi.
Und e Waichegnippel git's fir ihn e kain!
In Sache Trittbrätt-Stil isch kuum no ain verschlāggter -
Är waiss, in welere Kurve 's «Schomolgässes» git -
Är kennt dr Brämswäag vomene volle Drammdiräggter!
Numme: sälber schinebloche darf er nit!

Är isch no z'glai und neyschtens us de Windle'.
Zwor strycht är Duubedrāgg an d'Larve fir e Schnauz...
Jetz aber kunnt dr gross Momänt zem Schwindle
Und sy Drämmliseel brennt dure - und är haut's!
Bim Glegglidramperfygeblettermaischter
Bikunnt är (sibe Nummere z'gross) e Prachtsmontur.
Am Aescheplatz do schiggt er aine uffe Glaischter
Und wirft sich grandig hinter d'Elfer-Armatur!

Es muess eso-n-e Buschiwagegfiehl e Gnuss,
E hailige-n-Orgasmus sy fir d'Bebbiwält -!
Wenn sone glaine Schnuderbueb im Helleschuss
Anstatt e-n-alte Bufferboxer Di dur d'Gegend schnellt! -
Mainsch, wenn dä aimool wurd dernäbedrambbe…
Die ganzi Bsatzig landet hoch im Boge imene Mischt…
Mainsch, wenn dä abkirzt und denn inere Lampe
Gläbt uffem Dreyspitz! Bis me Di zem Blääch us fischt…

Vom Aescheplatz uff Aesch bigott und zrugg -
Das het däm Gneggis digg sy Hemmli gsterggt!
Däm Käshoch laufe-n-alli Schruube lugg -
Und niemerts, niemerts, niemerts het das gmerggt!!!

Zletscht aber griegt dä Knorrli haissi Fiess…
Und wo der Oberjehu en am Graage schnappt und fuschtet
Do sait dä Schnuufer sälig gligglig siess:
Es haig en halt so gopfergässe aimool gluschtet –

Me gseht, wenn's z'Basel amme naime holperet
Bim Babbe Staat - muesch joo nie aine hetze…
E Byrogummi wo no iber's aige Hirni stolperet
Kasch hitte miteme glaine Schnudergoof ersetze!
Und wenn de mainsch, dä Luusbueb haig no Gligg
Und syg em Kadi elegant dur d' Pfoote gschloffe,
Denn ligsch ganz richtig! Dr Beamtestaat het's digg:
Die pfuuse bständig oder sin die halb Zyt bsoffe -!

Kommentare sind geschlossen.