Faasnacht 1973 – „Die grosi Stareploog prés Bâle!“

Z´Glaihynige - isch das gerisse,
dien d'Stare dir uff's Köpfli schisse
und mache Krach - es isch e Qual -
und au fatal !

S göhn Brief an alli Departmänt,
dermit die Ploog au fänd e Aend,
doch d'Antworte, die sin banal
und so fatal !

My Dep befasst sich nicht mit Vögel,
mir länggt's am Pagg und au am Pöbel -
So schrybt dr Noldi sozial -
isch das fatal !

Im ZGB - vorne bis hinde
isch vo soo Vögel kai Gsetz zfinde
so maint dr ab-Egg ganz formal
es isch fatal !

Y kha nit hälfe, myni Finanze
die liege so scho uffem Ranze,
sait unsre Cheese ganz liberal -
oh, wie fatal !

Dr Baudep-Wulle, wo sott baue,
dä maint: Aer wurd´ die Baim umhaue,
es syg zwor ganz nit ideal -
und s'wär fatal !

S Pulver vo dr Sanität wurd´ nutze,
nur dät's d'Glaihyniger au grad butze,
Dr Miescher sait das radikal –
das wär fatal !

Die beschti Lösig kunnt am Aend
halt doch vom Police-Departmänt.
Dr Franzli schrybt -  my Personal
isch fir soo Ysätz maximal !

Das styggt uff d'Baim und au uff d'Dächer -
derwyl sin d'Stare als wie frächer !
es dunggt ys, sygi anomal -
e so fatal !

Do ändlig, ussem hoche Norde
trifft y e Tonband, das die Horde
vertrybe soll phänomenal -
jetz wird's fir d'Stare au fatal !

S wird giebt im ghaime, zwanzig mole,
am Dag und z'Nacht, duet's wiederhole
und gspiert im Innerschte vital -
es wird fatal !

Dä Starvertrybigsplan isch kiehn,
denn jo, die Stare mien, si mien
ihr Fäld jetz ruume ganz legal,
oh, wie fatal !

Me brichtet alle Zyttigsfritze
Und - mit em Franzli an der Spitze
goht's no Glaihynige près Bâle -
und wie fatal !

D'Aendlösig ruggt - doch, wo sin d'Stare?
Me isch sich dryber schnäll im klare
das isch e Katastrophefall -
eso fatal !

Dä Plan, dä isch verroote worde,
drum isch si ab, die Starehorde
und wyt scho yber Bärg und Tal -
isch das fatal !

Ob aimol meh, das spielt kai Rolle,
denn gwöhnlig, wenn d'witt d'Schugger hole,
kemme si z´spoot, das isch normal
und fyr uns ebe maischt fatal !

Uns Daig-Affe kame nit verjage -
mir kemme drum mit unsrem wage
an d'Fasnacht hitte s'vierzigscht Johr -
und das isch nit fatal - ´s isch wohr !

Kommentare sind geschlossen.