Faasnacht 1971 – Modeschau im Affehuus

Was isch au los im Affehuus -
si butze, fummle, `s isch e Gruus,
d' Frau Utan stöhnt: Wie ka-me-n-au
nur wäge däre Modeschau!

Jä lueg, sait 's Gomamammi do,
das muess so si, das isch eso;
die Affemensche wo do kemme
dien ihri Härkunft nit verglemme.
D' Verhaltigsforschig isch für sie
scho immer ganz exotisch gsi -
ob Affemensch, ob Menscheaff-
vom Unterschied bisch aifach baff !!

Jo waas, jä wirgglig, isch das so,
do bi-n-y aber wirgglig froh,
dass y d'Frau Orang-Utan bi
und schigg mi gärn ins butze dri !!
Der Tag isch ko, die Modeschau
luegt sich au aa d' Frau Vischer "Vau",
d' Frau Merian isch au scho do -
aifach tout Bâle - me weiss es jo!!

Der Doggter Lang isch ehnder kurz
in siner Aasproch - ihm isch's schnurz
was d'Mode koschte soll vom Kost -
luegt sträng in d'Richtig Nord-Nordost.
Dert duet, statt mit em Sägelschitfli
e Aff sich abgäh mit sim Pfiffli -
sogar der "Sten" und d' "Barbara"
hänn ihri hälli Fraid do dra!!

Ei Mannequin no-n-em andere
duet uffem Stäg jetz wandere
die einti schwäbt im Bi-Bikini,
die ander stelzt im Mini-Mini
So richtig schlaggsig und rächt dumm
im Usdrugg - au, jetzt macht's no wumm -
doch das isch numme d'Goma gsi -
die au gärn mecht begaffe si.

Aes polteret an d'Schiebe ane,
was heisst, jetzt gännt mer nundefahne
sälli Perüigge und dä Huet,
das gieng mir doch so äffig guet !!
Und dert - wie wurd doch veriwäll
mir stoh das Nudi-Look- Modäll -
doch usser ihr - vo alle Affe
duet kaine uff die Schau do gaffe !!

D'Frau Schimpans schimpft ganz ungeniert,
dä Stamm do uss degenneriert -
y wurdi nie mit so-m-e Lumpe
so uffem Laufstāg ummegumpe !!
Dass d'Goma so Marotte hett
kunnt nur vo däm, will äs im Bett
vo der Frau Lang uffgwachse isch
drum isch's hitt so-n-e Flääderwisch !!

Eins sagi- in das Affekaff
do iine kunnt kai Modeaff -
es wurd' mir schimpansäffig gruuse
en Affemensch am Aend no z luuse !!

Dorum git's nur ai Devise:

Fir e Modeschau vom Kost
numme in sim eigne Schopf !!
und fir d'Latärne-Usstellig
eh und jeh in d'Baslerhalle in der
Muschti. Zyt und alles anderi stoht
uff de Clique-Zeedel, wo ihri Latäärne
derte uffgstellt hän.

Kommentare sind geschlossen.