Faasnacht 1969 – COOP – VERDEGGEL, ISCH DER KONSI FRINDLIG !

Hitte wirsch g'impft uff aller Gattig Arte:
ins Fudi und in Arm, uff Dollwuet, Cholera;
me impft is uff Moraal in alle siebe Sparte -
der Konsi - dää mecht ebbis bsunders haa !
Er spritzt de Gumsle und de Filiaalebeggli
zwai Kubik Heefligkeit in Oberschänggel i,
uns Konsumänte tschuuderets ganz schregglig -
jetz wott der A-Ce-Vau no frindlig sy!

Ellai, die Impfig isch ganz negativ verlaufe,
e kains het reagiert, so wie's im Biechli stoht;
de merggsch es bald, wenn d'ebbis witt go kaufe -
denn muesch waddiert in Laade goh, verschtohsch !
Stegg jo die Kopf in Mantelgraage ine -
nimm d'Brille ab und s'Blettli stegg in Huet,
verdlehn no Schienbaischooner wägemine,
denn COOP-Verdeggel Seppli, jetz bruuchts Muet !

De froggsch naiv e Jumpfere no Anggezupfe
und was no suscht so uff dim Zeedel stoht,
denn mach di gfasst, si duet scho d'Braue lupfe,
loos numme, wie sich s'Stimmli yberschloht:
Was glaube Si denn, unterheelte Bebbi –
mir dääte zue, was jede Duubel wetti?
Es wird der COOP-Verdeggel diräggt schwindlig,
so, wie die Konsumgumsle dir kunnt frindlig !

Sinn Si au g'impft, ihr Heere Nyn-e-matter
und vo däm Stumpfsinn gar der geischtig Vatter?
Uns dunggt's - e Wärbeagentur vo „Züri“
hett do kopiert fir Sie d'Stadtbolizey,
die isch jo au so heeflig, "ja mi tüüri"
und aunoo im Ranzeschnittegäh rächt frey !
Dien Si doch luege, ass der A-Ce-Vau
in siner Laadegumsle- Uswahl isch meh gnau !

Mer däte meh im Konsi konsumiere -
wenn s'Personal e bitzli nätter wär;
ihm das vo obe-n-aabe uffdiggdiere -
das isch fir d'Katz - und nur e frommi Määr;
das orangsch Schildli, wo druff ditlig stoht:
Y bi mit hne frindlig - wird zem Slogan do,
Zem nätt si, COOP-Verdeggel, isch es z'spoht,
wenn's nit mit Muettermilch hesch yberkoh !

Im Konsiblettli und uf Zindholzbrieflideggel,
uff riesemonschtersupergrosse Farbplakat
gsehsch zwai wo lache - COOP- Verdeggel -
in ihre Deepli heebe sie Gerbera !
Die zwai sinn ainzig - und au wirgglig gnau,
doch - suechsch si ummesunscht im A-Ce-Vau!
Sinn ächt die zwai, wo do so frindlig lache,
vom Laade gegeniber? Derte het's so Sache!







Kommentare sind geschlossen.