Faasnacht 1953 – „Dr Oeelkomplex“

Friehner hett dr Schwyzer ganz bischaide
uff de Matte syni Kieh lo waide.
Hett dernäbe syni Gschäftli tribe
und isch niene eppis schuldig blibe.
Hett gschafft und isch rächt ziriede gsi,
laider duet das hitte nimm so sy.

Furt sinn sälli scheene Zytte,
s'Gäld duet hitt dr Schwyzer ritte.
,,Gäld-viel Gäld" und meegligscht wenig schaffe
das isch Trumpf bi däne Pseudoaffe.
Duet ene Ain verschpräche zwelf Prozänt,
schiesst me s'Gäld em noh - mit baide Händ.
Duet die dimmschte Sache finanziere
will me s'Gäld will ginschtig inveschtiere.
Isch e Sach au gänzlig iberex -,
So isch's gsi au mit em Oeelkompläx.

Mit Pändel und mit Winschelruete hänn-si
gsuecht und gsuecht - Oeel finde wänn-si.
Ganz wisseschaftlig zieht me-n-uff.
Dä Hindlibrunz - dängg - Oeelbohrbluff.
Und well's fir sie e bsunders Frässe gitt,
so hälfe d'Zyttige au gheerig mit.
Artiggel wärde gschribe ellelang,
grad ass me maine kennt: Nur ame Fade hang
s'jetz no - bald sig's so witt,
ass us dr Schwyz - e neyi Oeelmacht gitt!!!!

Si hänn halt gmaint, s'gieng wie z'Amerika.
Me miech e Loch in Bode - scho fieng's a
und s'Oeel kähm denn mit pfuse
grad dausig Literwis zem Bode-n-use.
Wie Schärmiis dien si iberall im Bode grabe.
Si bohre dief und immer diefer abe.
Die halbi Schwyz isch öeelbohrfimmelgrangg,
doch Oeel finde si niene, Gottseidangg!
Me schtell sich vor: Wenn Oeel si gfunde hätte,
wie denn in's Fyschtli lache dädte,
der Yänggi, der John Bull oder dr Russ
die gheite-n-is gli zue unserem Ländli uss.

Dr Oeeikompläx, dä hett si Raiz verlore
im Drägg si schtägge blibe sinn bis iber d'Ohre.
Die Ainzige wo sich no interessiere, sinn d'Kanteen
will die do drinn e neyi Goldkueh gsehn.
Doch glaub me nitt, ass die si kenne mälgge.
Will jo bekanintlig d'Oeelsumpfbluerme schnäll verwälgge.
Sisch gsorgt derfir, ass kaini Baim in Himmel waggse,
drumm Schwyzer - Händ ewägg vo deene Faxe!

Loos du das Lechlibohre si
s'duet ohni Oeel Dir weehler si
suscht kennt's di denn no gheerig rible
due lieber - - -  in dr Nase gnible!



Kommentare sind geschlossen.