Faasnacht 1951 – Ferieblausch in „Fleehschtriich“!

In der Zityg hett me's glääse
und macht dervo viel Gschrei und Wääse.
Der „Beppi" haig si Härz verlore
und sig verliebt bis iber d'Ohre.
Es ziech en nimme ibere Rhy
d'Donau dieg jetz Mode sy.
«Wien-Wien nur du ellai»
bisch s'Ziel gsi vo Gross und Glai!
S'Lääbe sig billig, s'dieg nyt viel koschte,
wenn me raise well noch Oschte.
E Jede hett gmaint, me haig deert unde
S´Paradies uff Aerde gfunde !
Nur d'Hotelier protäschtiere z'Bärn,
die hänn's halt gar nit gärn,
wenn der Schwyzer use goht
und si Pulver dusse loht.
Si miechte-n-an der Gränze duure
am liebschte grad d'chinesisch Muure.
Doch nutze dät's nytt, es isch eso,
der "Beppi“ will noch „Fleehschtrich“ goh.
„Me“ will deert unde eppis erlääbe,
„Me“ sait, me well noch Bildig schträäbe.
„Me“ goht in d'Donau au go bade,
griegt Gluscht noch «Wienergrittewade».
Me haut aini a: «Was isch, kunnsch mit? »
Si blitzt en abb: «Döös vaschteh i nitt!»
Duesch aber e Huffe Neetli blitze
kunnt si gschnäll go ane sitze.
Si sinn uff d'Kärtnerschtross go spure
dien nochhär e bitzli «Nacktkulture»!!
Die Wienergritte hänn's verstande
bi de „Beppi“ richtig z'lande.
Uff aimol merggt er's, oh herjee
am e zymftige Loch im Portmenee.
An sonige «Gschäftli» fählt's deert nitt,
will au das Devise gitt.
Im e-n-Andere isch s'Aesse Läbenszwegg,
er isst de Wiener s'Bescht ewägg.
Und isch me mied vo deene Schtrapaze
denn liegt me naime uff d'Matraze.
Villicht hett me Gligg, oder au nitt,
will's au deert unde «Soo Dierli» gitt.
Hett ain aber si Frau mit sich gnoh
so vertribt s'em der Pulver au, he joo.
Es dieg doch alles sooo billig sy
drum kauft me e Huffe Sache i.
Me zahlt derfir wirgglig e glaine Bolle
der Greesser zahlt me denn bim verzolle.
S'isch iberall glych, me wird halt grupft,
Paris oder Wien, s'isch gschprunge wie ghupft.
Hett eppe ain Bääch, no schnappt en der Russ,
Ihn leehn si laufe, sy Pulver blibt duss.
Wien blibt Wien, so haisst's doch immer,
doch gseht me vo dämm nur e glaine Schimmer.
So ne Rais noch «Fleehschtrich», s'isch kai Gfasel,
was es deert git, gitt's au z'Basel.
Drumm dängg dra «Beppi», wenn d'wieder goosch,
s'goht nur um die Pulver, gäll de verschtosch!!
Wäg dinere Scheenheit, de bruchsch nitt maine,
uff die gitt dir in Wien Kredit e Kaine.
So sinn passiert e Huffe Sache,
mängmool zem hile, mängmool zem lache
Und d'Wält draiht sich witer, s'goht alles ver bi,
drum wår's doch sicher nitt neetig gsi,
aas me z´Bärn isch goh reklamiere
und in Zytig goh Schweezri verschmiere.
«Rootschtibli» här und «Rootschtibli» hi
der Beppi isch inmmer e Beppi gsi.
Sait me-n-em; «Nail», so sait ärt «Jo» !!
und duet grad äxtra nonemool goh.

 

Kommentare sind geschlossen.