Faasnacht 1938 – S’ney Krankekassehysli

Die Baslerpeppi sin sunscht schlau
Si lehn sich nit verdaible
Leider nur iber d´Fasnachtszit
S´Johr dur sin´s dummi Kaibe
E jede Ruech mir e wenig G´schigg
Macht z´Basel gly in Politik
Sigis bi de Rote oder Gäle
Der Dubelpeppi tuet en wähle
´s isch em alles wurscht derby
D´Hauptsach isch – s´dörf kai Basler sy
Wenn so e Dissi vom färbe mied
In der Partei gar nimmi zieht
So suecht me ihm – will är gar köschtli
Irgendwo e Verwaltigspöschtli
So isch´s mit em Herr leider gange
Lang isch är in der Schwäbi g´hange
Z´letscht hän die vier usgmacht bim Jasse
Mer dien dä Ma in d´Krankekasse
Ob er im Hirni der nötig Mumm
Do kimmert sich kai Deifel drumm
´s isch glich wo aine si Name schmiert
Ob ain dert meh isch – wo nit rentiert
Wär au das Gschäftli tuet verwalte
´s Mitglied het dert si Klappe z´halte
´s erscht was dä startet in däne Zyte
Isch fir d´Verwaltig e neiy Hitte
Me macht in Vorträg de Lyt bikannt
Sig alles viil z´wit use-n-and
Au s´Finanzielli miess besser klappe
´s git erhehte Warnigsrappe
´s Mitglied muess zuem guete Glinge
Im Abidegger d´Gitterli bringe
Derfir derfsch jetzt, das ische e Neiye
Fir d´Krankeschyn drei Batze bleye
Zue däm wird der aempfohle
Bim krank si jo kai Arzt meh z´hole
´s heb doch kai Wärt kurz vor em Dod
Dass eine no zum Doggter goht
Das Gäld, do simmer doch im klare
Ka me der Krankekasse spare
Kurzum fir die gwehnlige Birgerslyt
Git´s jetz emol e anderi Zit
Si wänn firs ney Verwaltigshus
Der Pulver immer jetzt voraus
Was aim am Ö.K.K. Schalter frait
Isch die bekannti Frindligkeit
Hopp zahle jetz und rasch e glei
Suscht hälfe mer mit der Polizei
Mer hänn e Extra-Paragraf
Der Beppi zahlt da klai und brav
Verhebt sich ruehig wie-n-e Muus
Si zieh-n-em au no s´Hemmli us
Dä ka jo blutt und in de Sogge
In ihri neie Wartsäl hogge
Der Beppi dänkt i ka jo warte
Bis nit meh glänzt an miner Schwarte
Blibt mir nur no e glaine Drägg
Gehen d´Schmeisser vo elei ewägg
Er isch bikannt fir si bös Muul
Doch fir sich z´wehre isch er z´fuul.

Kommentare sind geschlossen.