Faasnacht 2020 – Goot s dir guet oder au verschisse, dr Dani will das fir sy Radio wisse ! (Daig-Affe mèchte au mitschwätze!)

Inzwische waiss das fascht e jeede,
hesch e Bròbleem und wotsch driiber reede,
Dènn lyt doch ganz schnäll im Dani aa,
är frait sich, wenn är am Radio disggutiere kaa,
numme ains isch e weeneli dooff,
die Sändig isch wääred unserem Midaagsschlooff!
Das isch doch graad zem Luuse,
mir dien die drùm reegelmässig verpfuuse!


Vò Rieche dùr s Glaibaasel nach Mätzerle,
Mir hätte au gnueg Süüschee zem Schwätzerle!


Mir fange bim Ozeanium aa,
worum het me das in Baasel nit welle haa,
doch die Froog muesch nimme stelle,
die Griene hän das Bròjäggt nit welle,
ob jetzt guet oder schlächt,
demòkratisch het d Mèèrzaal immer rächt!


S Glyyche bim beriemte Margrethestich,
so èppis isch doch fèècherlich,
au dèrt het me kènne duure stiere,
me nit dèrf s Drämmli dr Bäärg ùffe fiere,
lieber würdi me, do hätte mir nit dergeege,
d Halstelle Doorebach und Zolli zämme leege!


Mir sin nit frauefindlig, – im Geegedail,
dass si demònschtriere finde mir sogar gail,
äs isch dènn saumässig vyyl loos,
wenn ùnseri Gritte geen ùff d Strooss,
numme hän die Joomergrääze ganz vergässe,
si kènne sich nie mit ùns Hiirsche mässe!


Si dien aifach anderscht digge,
drùm blyybe mir a Männercligge!


Sit am Gòòrtèèsch e Gaul usgschiiferet isch,
liigt das Theema wider uff em Disch,
fir Dierschitzer isch das e Schisserei,
si mache druus e grosses Gschrei!
Mir maine sälbi Fraue und Manne,
setti me sälber vor e Chaise spanne !


Naimedùùre finde mir s schaad,
ooni Deelifoonkabiine isch dr Baarfi faad,
au die Dradizioon isch ewägg,
ibrig blyybt dèrt e lääre Flägg,
doch no schlimmer isch, me ka s kuum verstoo,
me het ùns dermit dr Dräffphùnggtègge gnoo!


Iber dr FCB dien mir nit schimpfe,
geege das Virus hän mir is lo impfe,
zue all däm jämmerliche Sääge,
im Verwaltigsroot no dr ainti Dääge!
Schyynbar fyylt är sich no zwääg,
fir dr dritti Bildigswääg!


Stundelang hän si gwaartet,
bis Patrouille Suisse ändlig staartet,
z Langebrugg froogt e glaine Gnäggis:
«Mache die ächt mit eus Versteggis?»
«Nai, sait ain im Kontrollzentrum unde,
die hän aifach s Baselbiet nit gfunde!»


In däm Phùnggt het dr Dani rächt,
e Wèlò ooni Liecht isch schlächt!
Mir hoffe sy Aktioon duet gryffe,
«Schalt doch s Liecht aa du Pfyffe!»
Aer wetti gäärn die Aarme haile,
und duet mit dr Schmiir Pfùnzle verdaile!


Èppis macht ùns rächt Sòòrge,
me ka s lääse fascht jeede Mòòrge,
vò Ùmfäll, Lämpe, s isch zem Schreie,
und no vò vyyle andere Sauereie!
In unserer Stadt het s efang zvyyl Phagg,
s Wieschte – jeede het no e Mässer m Sagg!


Iber e anders Pròbleem kennt me schneede,
uff guet dytsch haisst das reede,
wo sin ùnseri guete «alte» Baize blyybe,
worum duet me die noodisnoo verdryybe?
S Laadestärbe in dr Innerstadt duet aim wee,
bald git s au kaini soonig Guetschyyn mee!


Sicher git s no anderi Sache,
was me kènnti zem Thema mache!
Das isch au nit ùnser Ziil,
wärbe fir dr vo Wattewyl!
Mir hän nach em Hiirne vò vyyle Stunde,
fir s dissjèèrige Süüschee nit Gscheiters gfunde!

Kommentare sind geschlossen.