Faasnacht 2016 – Au mir syy dergeege!

Fasnacht 1

Au mir syy dergeege!


P
atriotische Extremfasnächtler Gege Infiltrierig
Durch Asyl-Landschäftler (in corpore mit em Dupf-Club)

Die Asyl-Landschäftler dèrt obe uf dr Waid,
ooni Kool, si dien uns schandbaar laid,
die Arme,  so wie mir das maine,
dèrfe sich nimme mit uns Stèdter veraine!
Im Prinzip würde mir das sogar begriesse,
wenn me nach obe kènnti Gränze schliesse!

Zuegää, me dèrf hitte nimm so dängge
und dä Kaare in e falschi Richtig längge!
Mir frooge uns aber, und zwòòr rächt barsch,
worum bùffe mir däne nò 80 Millione in Arsch?
Isch das jetzt dr scheeni Loon,
fir die abgwinggti Fusioon?
Das isch wiirgglig nit zem Lache,
drum dien mir das au nit zem Süschee mache!

Vyylmee mèchte mir do insischtiere,
mir syy au gege das kaibe Infiltriere!
Do het dr Dupf Club zimlig rächt,
fir unseri Faasnacht isch das aifach schlächt!

Aes ka doch am Gòòrtèèsch nit syy,
du ooni Laarve bisch derbyy!
Im Allgemaine sy mir gwiss nit stuur,
doch an dr Faasnacht pflääge mir Kultuur,
si nämme efange in dr Stadt iberhand,
die Mèchtegärnfasnächtler vom Land!

Die mit ire aagmoolte Kèpf,
sinn im Grund gnoo armi Trèpf,
si griege doch dä Drägg,
fascht nie mee ewägg!
Au Vermummti het s uf dr Physchte,
die setti me schnällschtens uuse mischte!
Das het mit Faasnacht nit am Huet,
e Uffbùtzete wäri dòòrùm guet!
Wo duet das sùscht aanefiere,
wenn mir nit dergeege demònschtriere?

Dr Muser Schang würdi z Basel wider singe,
vò Baiz zue Baiz sini Antibaselvärsli bringe.
Als Fantom hesch in no kènne loose,
mit Schnitzelbängg goot s aber voll in d Hoose!
Fir d Rambasse mag das jo gniege,
fir uns isch das aber kai Vergniege.
dèèrig Rootstäbler, und no vyyli anderi mee,
setti me an unserer Faasnacht nimme gsee!

Au die Gugge wo iber Gränze kèmme,
dien unseri Clique zimlig hèmme!
Dermit die Exote nit wyter stèère,
mien mir uns dergeege wèère!

Zem Byspiil mit Yyfierverbòtt, Gränzkontrolle,
do kasch denn schèpfe us em Volle,
Subventione stryyche, Gsichter brieffe,
proteschtiere und lut usrieffe,
wär nyt will inveschtiere,
dèrf au nit lènger profitiere!
D Uni, s Theater und s Spittel dèrfte die Rueche,
ganz aifach in Basel nimme bsueche!
Die selle doch dèèrt oobe blyybe,
iri Freizyt mit Kiirsistaispeie vertryybe,
mir wäre an de Bummelsùnntige nò so froo,
si uns weenigschtens doo nit im Wääg dien stoo!

Mir säge denn au wie dr Florian Kneus:
„Mir wei luege, aber numme für eus!

Kommentare sind geschlossen