Faasnacht 2015 – Unser Süschè dissjohr ooherrjee, isch so wyss wie Schnee

Fasnacht 2015

 

Kasch Du ùnser Süschè verroote, griegsch e gueti Noote!

 

An ùnserem Gòschdyym merksch nò glyy,
um s Verwòòrge wänn mir kaini Waggis syy!
Alli die wo ùns am Gòòrtèèsch „Waggis“ rieffe,
sètte ire „IQ“ sòfòòrt grintlig lo brieffe!

Langsam duet ùns das verlaide,
mir frooge uns, wiesoo denn nò verglaide,
wòrùm ùnsere Waage farbig stryyche,
mit „Wyss“ hèsch jò s glyyche,
unsere Zeedel kasch au nit rieme,
laider lääst dä fascht nieme!

Mir hänn nyt gege d Waggis im allgemaine,
vor allem gar nyt gege die Rasseraine!
Alli wo bhaupte mir gseen glyych wie Waggis uus,
die kèmme jètz wiirgglig gaar nit druus!

Mir sinn „Daig–‐Affe“ und wänn das au blyybe,
das muess me sich äntlig hinder d Lèffel schryybe!
Mir dèrfe dòòrùm lut saage,
mir hänn au dissjòòr e Süschèwaage!

Um ùnseri Idee kènne verstoo,
muesch halt s Hiirni schaffe loo,
mir mache kai grosses Gschyss,
moole statt schwarz alles wyss.
Kàsch du ùnser Süschè verroote,
griegsch e bsùnders gueti Noote!

Was uns au näärvt – oh Himmel,
isch dä bleedi Amtsschimmel!
Aes het schò èppis draa,
hitte muesch fir jedes Gaggaa e Bewilligung haa!
Das kùnt emänd nò so uuse,
e Bewilligung bruuchsch zem Pfuuse,
blyybsch in dr Staine gschwind stoo,
wird dir gwiis dr Uuswyys gnoo!

Duesch mee als dreimool niesse,
will me schò uf di schiesse,
duesch emoole lut barlaare,
faart me dir graad an Kaare!
Gòòsch mit dym Gspuusi am Ryy spaziere,
muesch si näggschtens an dr Laine fiere!

Hesch dringend Noot,
gänn mir dir e guete Root,
wotsch kai Buessezeedel am Bai,
due s verglèmme bis dehai!

Dir händ jetz alli gsee,
iiberall Reegle und allewyyl mee!
Schyyns duet d Stadt wider Lyt yystèlle,
Si kèmme nimme nooche mit Baragrafe zèlle!
Mir kènnte das besser schètze,
wenn me anderi Prioritäte würdi sètze!

Mir dängge do an das gspässige Ding,
wie das sogenannti “Littering”,
laider isch das hitte krass,
gwiisi Gwaggli hänn dèrt kai Mass.
Schnääflede, Drägg, in jedem Egge,
dä Aabligg miessti dr letschti wègge!
Dèrt setti me aifach duure stiere,
dass d’Schmiir mee duet kontrolliere,
und die Abfallduurischte,
grindlig dien uuse mischte!

In dr Stadt und au uf em Land,
nämme d Yybrich efange iberhand,
me setti grad alli Kriminelle,
haart bestroofe und an d Gränze stelle!
Wär das nit e gueti Idee,
mir bruuchte dènn kaini “Initiative” mee?
Äs wäri doch saumässig glatt,
hätte mir wider e suuberi Stadt!

Mir mache kai grosses Gschrei,
aber mir sinn gege die Baragraferytterei!
Reegle sinn guet und rächt,
iberdryybe isch aber schlächt!
Nit numme bi ùns, au im ibrige Land,
nimmt dr Byyroogrieg und dr Bùlver iberhand!
Mir frooge ùns nundefaane,
wo fiert dènn das no aane?

Die vyyle Aemter miesste iri Koole,
nit mit Uusstèlle vò Bewilligunge hoole!
Mir rytte mit guetem Byspiil vòòraa,

Kommentare sind geschlossen