Faasnacht 2014 – Dr Aff vom Glaibaasel im Exyyl!

Fasnacht 2014

Dr Aff vom Glaibaasel im Exyyl!

 

Als Affe kènne mir das guet verstoo,
in däm Zuestand me Baasel muess verloo,
drùm mèchti är gäärn ins Exyyl,
aber woaane ? Affe het’s iiberaal zvyyl?

Är brielt ins Migrofon zimlig baarsch:
„Lägget mir doch doo alli am Aarsch!“
Dr grossi Root und nò anderi mee,
dèrfe ùff „You Toube“ sy gails Fùùdi gsee!
Mir kènne zwòòr èppis vertraage,
e sèttig Aabligg schloot aber ùffe Maage!

Sapperlòtt und naimeduure,
hänn mir mit im sogaar Beduure,
är isch mit de Näärve dùnde,
in Baasel wird är drampt und gschùnde,
ins Gfängnis will är nie mee goo,
dèrt het me in schyyns im Rauch lo stoo,
d’Staatsanwaltschaft haig in ùff dr Latte,
är wird verfolgt vòm aigene Schatte!

Mir alli kèmme doch nit druus,
drùm wanderet är nach Abu Dhabi uus!
Elai die Ydee isch nit dernääbe,
villicht hätti är dèèrt e besser Lääbe!
Kaini Gauner, kaini Keefi, kaini Reegle,
und kaini Schugger wo aim kènne veegle.
Kaini Ussländer, kai Granggekasse, kaini Styyre,
das wäri doch e guete Grùnd zem fyyre!
Vilicht dèrf me in däm Land Gipfeli verschängge,
ooni dass aine driiber schlächt duet dängge!

Bi däm Sujet kèmme mir in Form,
unseri Vorstelligsgraft isch enorm!
Dr Aff unterem Baldachin als Schaich,
do wärde gwiis e baar Gùmsle waich!

Aini sait so mit em Spiegel in dr Hand:
„Du bisch doch dr Scheenscht im ganze Land!“
E anderi lyyslet im ins rächte Oor:
„Du kùnsch mir wie dr Prinz vo Rieche vòòr!“
Die lètschti maint: „Bisch du aber fit,
laider verstoo ych aber di änglisch nit!“

Im Harem und bi de Eunuuche,
in Abu Dhabi, ? ka me in esoo au bruuche?
Do maine mir ganz schyych im Wind,
das aber nùmme mit eme Duech ùme Grind!
Hitte waiss das fascht e jeede,
au im Oschte dèrfsch nit bleed reede!

Uff jeede Fall sinn in Baasel vyyli froo,
är wäri dèèrt und nimme doo!

Kommentare sind geschlossen