Faasnacht 2010 – Frèmdsprooche im Bùschialter?

Fasnacht 2010

Mein Gott Walter, ?
Frèmdsprooche schò im Bùschialter?

Isch das guet, dien mir ùns frooge,
unseri Gnäggis sò frie mit frèmde Sprooche blooge?
Mir sinn halt jetzt ganz diräggt,
in däm Alter verstoosch au nit jeede Dialäggt! (z.B. ziiridytsch)

Gang emool in e Schuel go luege,
äs jaagt di us de Fuege.
Türkisch, russisch und albanisch,
polnisch, italiäänisch und japanisch,
die ainte draage Diechli ùff em Kòpf,
die andere hänn e gflochtene Zòpf!
Froogsch di wiirgglig emänd,
sinn mir doo ùff em rächte Kontinänd?

Mir sinn zwòòr kaini Frèmdefind,
aaber das goot ùns nit in Grind,
mir wètte au niemed bikèère,
doch miesste alli zèèrscht Baaseldytsch lèère!
Mir Wäägeler würde dervoo nur brofidiere,
und kènnte am Gòòrtèège au wider intrigiere,
mir wäre doch nò sò froo,
me kènnti ùns rächt verstoo!

Fir d Finanze wäri das au kai Bòschte,
Frie – Aenglisch und Französisch würd mee kòschte,
wenn s ainewääg am Stùtz sètti fääle,
miesst me aifach anderi Politiker wääle!

Mir laufe mit em guete Mùschter vòòraa,
und fange mit dr èèrschte Gratisstùnd fir Baaseldytsch aa!
Zem Byspiil nämme mir s Wòòrt “Frau”,
wievyyl Uusdrigg git s bi ùns derfiir genau?

Vò Bèèri, Blääch, Däsche, Drùgge, Duech,
äs gitt nò mee, das isch e Fluech.
Fyyge, Gyyge, Gòtte, Gùmsle, Gùùre,
und fir sèttigi, wo hänn e frächi Schnùùre.
Lämpelyysi, Rätzebälle, Ryybyyse, Händelkatz,
so eppis saisch lieber nit im aigene Schatz!

Mir wän nit bartei’isch wäärde,
aber äs gitt jò nò Männer ùff däre Aeärde;
Bappeli, Däppeli, Datteri, Sèggel,
Dryybel, Ganggel, mit und ooni Dèggel.
Fir dr Jùùged gitt s Nämme, ? ojee,
das hesch in kainer andere Sprooch jee gsee.
Gnäggis, Goof, Grapp, Gwaag, Setzlig, Mògge,
Bintel, Byppeli, Meegerli, mit oder oni Sògge.

Mir hoffe, ir wisset jetzt e weeneli Bschaid,
Wär noonig druus kùnt, duet is laid.
Ains mèchte mir nò saage,
das Thema liggt ùns schò länger ùff em Maage!

E Waggis isch kai richtige Maa,
So sait me im Gòschdyym und dr Laarve, wo är het aa,
das kùnt us em Elsass, velicht vò Hääsige,
wäge sym Zingge, däm saumäässige!

Aes isch dr Momänt, ? jetzt sag i’s,
Nit jeede Faasnachtsnaar isch e Waggis!

Kommentare sind geschlossen