Faasnacht 2019 – Ojee, – dä Abschiid duet wee! (Daig-Affe druure um ùnseri MUBA)

D MUBA isch nimme gsii so fit,
drùm het si gmacht «exit»,
mir kènne zwòòr nit verstoo,
wòrùm si het miese goo?
Vor iber hundert Jòòre,
het me si gebòòre,
jetzt isch si ùfaimool ewägg,
vòòrig blyybt e lääre Flägg!

Unseri Tradizioone wärde langsam gnab,
aini mee goot dòò dermit bachab,
wòrum schrittet Dänggmoolpflääg do nit yy,
si hänggt doch sùnscht iiberaal d Schnùùre dryy?

Me het gwisst, – d MUBA isch grangg,
wie syynerzyt au e gwiisi Bangg,
die isch aaber schyyns wider gsund,
aber numme mit dr Hilf vom Bund!
Wiesoo isch das doo nit gange,
me het d Mueter vò alle Mässe loo hange!
Fir d Uustèller isch das e Frùscht,
fir ùnseri Stadt e grosse Verlùscht!

Mit dr MUBA het ùns vyyl verbunde,
mer hänn dèrt erlääbt mängg scheeni Stunde!
Im Friejòòr het me sich troffe,
in de Degustazioone ùmme gsoffe,
dernääbe vyyl pflùùderet und glacht,
wie das e Daig-Aff halt so macht!
Doch laider isch das jetzt passee,
drùm macht s halt schuurig wee!

Jetzt wänn mir uffhèère mit gryyne,
emoole wird au d Sunne wider schyyne!
Alles isch amene Daag verbyy,
zrugg blyybt ùns numme d Nostalgyy!

Die anderi Syte het au sy Raiz,
jetz hesch wider Blatz in dr Baiz!
Aaber was ùns frait am maischte,
Du kasch dir s Bier wider laischte!
Muesch fir ai Nacht e Hotelzimmer haa,
lyt doch aifach dr «Trivago» aa,
kasch weele vo drei bis finf Stäärn,
die bueche fir di kinftig no so gäärn!

Was macht das aber fir e Falle,
s Mubagländ voll vò lääre Halle?
Mir hätte doo e gaili Idee,
wältwyt het me das no niene gsee!

Me kènnti doch, – das setti me guet iberleege,
dr ganzi Zolli unter das Dach verleege,
do würde mir Affe hailoos profitiere,
und mieste nimme so an Ranze friere!
Dä Dischbedaat um s Ozeanium wäri au verbyy,
sovyyl Blatz fir das Projekt findsch nimme so glyy!

E anderi Bieridee, – doo griegsch graad waichi Gnei,
wäri doch e frischi, super grossi Brauerei!
Dermit das Gsèff dernoo au jeede kennt,
hätte mir das «Muba-Aadiefrischbräu» gnennt!
Isch die Vision nit au famoos,
ùnseri Fantasie isch halt gränzeloos!

Wäge all däm und no vyyle andere Sache,
dien mir so gäärn Fasnacht mache!

Kommentare sind geschlossen.