Faasnacht 2018 – Kimftig hèsch kai Waal, muesch ins Fusionsspidaal!

Kimftig hèsch kai Waal,  –

muesch ins Fusionsspidaal!

(mir Affe richte ùnsere neie Waage ùmesùnscht als

Sammelstèll fir Nootfäll us baide Baasel yy)

 

Nach dr Abstimmig isch alles offe,
kàsch aifach nùmme hoffe,
du blyybsch bis zùr lètschte Stùnd,
mee oder weeniger gsùnd!
Initiative hii oder häär,
d Biire sinn efange läär!
 
E Spittelfusion isch guet und rächt,
me froogt sich, um was goots doo ächt?
Mir Affe hänn ùns iiberlègt,
was aigentlig hinder däm ganze stègt?
 
Die Abstimmige ùff em Land,
nämme ùns langsam dr Verstand.
Syynerzyt het me dèèrt dùùregstiert,
dass Stadt und Land nie fusioniert,
die Rammel dien ùns schandbaar laid,
wo sälbmool e „Nai“  hänn in d Urne glaid!
Au doo hätti me Batze kènne spaare,
statt de Stèdter sò an Kaare z faare!
 
Mir wisse nit was das sell,
jetz isch e Fusion wider aktuell!
Wenn halt Bòlitigg duet bestimme,
goot vyyles aifach nimme!
Hitte derfiir, mòòrn dergeege,
das ka aim fùùrchbaar ùffreege!
Sälb Argumänt isch e schlächte Witz,
s Bruederholzspidaal bringi kaini Stitz!
Wo duet das schlussäntlig aane fiere,
wenn ùnseri Gsùndhait muess rèntiere?
 
Was ùns derbyy bsùnders stèèrt,
friener isch das gsii umgekèèrt,
dr ganzi Baaselbieter Stolz,
isch glääge  ùff em Bruederholz,
fir s Birs- und Laimedaal,
isch dä Oort doch ideaal!
 
Statt die scheeni Fäärnsicht z gniesse,
will me das Spittel aifach schliesse!
 
Dèrfsch gaar nit èèrscht draa dängge,
hèsch e glaine Umfall in Biel-Bängge,
kùnt dr Käch mit em Granggewaage,
gschwind ligsch dènn ùff em Schraage,
statt ùffs Bruederholz ab in d Stadt,
mit däne Baustèlle isch das nit so glatt!
Kùnsch mit Blauliecht dènn emoole aa,
muesch Stunde waarte bis du bisch draa!
 
Zallerèèrscht kùnt e Studänt und froogt di uus,
spannsch no glyy, dä kùnt noonig esoo druus!
Wie isch das basiert, will är wisse,
gspyyrt aber nit, s goot dir bschisse!
Doch das isch jo nit so wichtig,
Hauptsach, – är het èppis fir d Statistig!
S Wytere wänn mir Eich  erspaare,
das isch  nùmme fir ùns Fasnachtsnaare!
 
Dèèrig Mischterli zaige aber dytlig ùff,
Me macht um die Spittelgschicht e grosses Bùff!
 
Dòòrùm blyybe mir Affe bi Verstand,
mache kai Underschiid  zwische Stadt und Land!
Im Kùnträare, mir mache fascht jeedi Wètt,
bald lande baidi Baasel doch nò im glyyche Bètt!
Gsundhait isch bi de Junge und de Alte,
e Guet, – wo me au barteiloos sètt erhalte !

Kommentare sind geschlossen.