Faasnacht 2017 – Nit esoo schlächt, mir Affe griege mee Rächt !

Fasnacht 1

Daig-Affe anngaschiere sich fir die Iniziative

Was underschaidet d Mèntsche vò uns Affe?
Mir sin nit so bleed und dien e Lääbe lang schaffe,
mir miese ùns au nit jeede Daag verglaide,
das duet aim doch mit dr Zyt verlaide!

Immer sich miese iberleege,
was sòll y hitte wider aaleege?
Stòòsch dènn phèrbläx vor dr Glaidertrue,
weeli Grawatte basst jètz zù de Schue?
Miesti vilicht dr Tschoope offe draage,
was duet ächt dr Schèff derzue saage?
Stimmt myni Friise emänd esoo,
oder sètti y zèèrscht zem Gwaffeer goo?
Was fir e Meiggap due ych hitte stryyche,
dermit y nit uusgsee wie e Lyyche?

Als Aff hèsch all die Sòòrge nit,
dòòrum blyybe mir bùschber und fit!
Mir mache au nit ùff stuur,
unser Gòschdyym isch halt Naduur buur!

Mir dèrfe Naaseboore und au Luuse,
kènne jeederzyt und iiberaal go pfuuse!
Stùtz verdiene liggt uns fäärn,
do bikèmme mir jò Subventione us Bäärn!

D Kèèrsyte isch vò däre Gschicht,
ùns schützt uff dr ganze Wält kai Gricht!

Mir wärde moriggslet und au gwäält,
wil ùns das Rächt fir „Unversehrthait“ fäält!
Obwool mir nò ùff allne Viere miese lauffe,
mèchte mir ùnseri Kèèrper nit verkauffe!
Das isch aber jetz nit zem Lache,
d Mèntsche selle d Versiech an sich sälber mache!
Unsere Vorschlaag, aifach und banaal,
mir maine, das wäri e saugueti Waal!

Dr Kèmyy würdi das sicher au nütze,
und ùns Viicher besser schütze!
Nieme würdi das wyters stèère,
me dermit „Zùchthüser“ kènnte lèère!

Die Initiative us Baasel finde mir guet,
die macht uns Affe wider Muet!
Dr Mèntsch setti s doch efange kapiere,
ooni Hilf mien mir eeländlig grepiere.
Drum bättle mir um jeedi Stimm,
und hoffe, äs wird nit so schlimm!

Mir hän am Lääbe doch glyych vyyl Fraid,
luege mir doch zrugg in d Vergangehait!
Was isch bassiert vor iber duusigi Jòòre,
dr Mèntsch isch us em Aff gebòòre!
Bi allem duet me das gäärn vergässe,
mir dien nit nùmme Banaane frässe!

Syynerzyt het me ùns halt bschisse,
me muess nämlig das alles wisse!
„Dir Mèntsche sind jò vyyl vyyl spöter koo,
und händ ùnseri Grundrächt ewägg gnoo!“
Dòòrum isch das gar nit schlächt,
mir Affe griege wider mee Rächt!

Kommentare sind geschlossen